काठमाडौँ । कञ्चनपुरको भीमदत्तनगरपालिका वडा नम्बर २ की १३ वर्षीया निर्मला पन्तको बलात्कार र हत्या प्रकरणमा थप दुई जना प्रहरीलाई निलम्बन गरिएको छ । निर्मलाको सुरुवाल पखाल्ने प्रहरी जवान चाँदनी साउद र घटनाको अनुसन्धान नगर्ने प्रहरी नायब निरीक्षक हरसिंह धामी निलम्बनमा परेका हुन् ।
चाँदनी र धामीसँगै निर्मला हत्याकाण्डमा निलम्बनमा पर्ने प्रहरीको संख्या ८ पुगेको छ । कञ्चनपुरमा गत साउन १० गते बलात्कारपछि हत्या गरिएकी १३ वर्षीया पन्तको हत्याबारे छानविन समितिको सिफारिसमा प्रहरी प्रधान कार्यालयले घटनास्थल अनुसन्धान अधिकृतका रुपमा खटिएका प्रहरी नायब निरीक्षक धामी र निर्मलाको सुरुवाल पखाल्ने प्रहरी जवान साउदलाई निलम्बन गरेको हो । प्रहरी प्रवक्ता एवं प्रहरी वरिष्ठ उपरीक्षक शैलेश थापा क्षेत्रीले अनुसन्धानका क्रममा गम्भीर लापरबाही गरेको पाइएकाले धामी र साउदलाई निलम्बन गरिएको जानकारी दिए ।
बलात्कारपछि हत्या गरिएकी निर्मलाको कपडा पानीमा पखाल्ने कार्यमा प्रज चाँदनीको संलग्नता रहेको थियो भने सई धामी मतियारका रुपमा उभिएका थिए । दुवै जनालाई प्रहरी नियमावली २०७१ को नियम ११५ को उपनियम ६ (क) र (ग) अनुसार निलम्बन गरिएको गृह मन्त्रालयले जनाएको छ । घटनामा दोषी देखिएको भन्दै गृह मन्त्रालयले जिल्ला प्रशासन कार्यालय कञ्चनपुरका तत्कालीन प्रहरी उपरीक्षक डिल्लीराज विष्टसहित पाँच जनालाई यसअघि निलम्बन गरिसकेको छ ।
No comments:
Post a Comment