जलिरहेको आमाको चितामा ७ वर्षीय बालकको नजर, मलामीहरु सबैका आँखा यो दृश्यले रसायो

तस्बिरमा देखिएका नाबालक बाँकेको खजुरा गाउँपालिका वडा नम्बर ४ ई गाउँका नरेन्द्र बिसी र लक्ष्मी बिसीका ७ वर्षीय छोरा हुन् ।

उनले एकतर्फी नियालिरहेको बलिरहेको आगो सामान्य आगो नभएर उनकी आमा लक्ष्मीको बलिरहेको चिताको हो । सोमबार बिहान घरनजिकै रहेको किरणनाला घाटमा लक्ष्मीको मलामीमा पुगेका जोकोहीका पनि आँखा यो दृश्यले रसायो ।

७ वर्षीय विपिनले आमा लक्ष्मीको पार्थिव शरीरमा दागबत्ती समेत दिए । आमाको मृत्युको बारेमा अञ्जान देखिएका विपिनले एकोहोरो आमाको बल्दै गरेको चितामा हेरिरहे पछि मलामीहरु सबैका आँखा रसाएका थिए ।

क्यान्सर रोगबाट पीडित ३७ वर्षीया लक्ष्मीको आइतबार राति निधन भएको हो । लक्ष्मीका श्रीमान, एक छोरा र एक छोरी रहेका छन् ।