ग्रान्डी अस्पतालमा औषधी ‘ओभरडोज’बाट मारिए बिरामी, ९ लाख ५० हजारमा मिलाइयो

काठमाडौं, २२ असोज । दिपेन्द्र कुँवर अध्यक्ष रहेको धापासीको ग्रान्डी इन्टरनेशनल अस्पतालमा औषधिको ओभरडोजका कारण बिरामीको मृत्यु भएको पुष्टी भएको छ । उक्त मृत्यु प्रकरणलाई ९ लाख ५० हजार तिरेर मिलाइएको पनि खुलासा भएको छ ।

आफन्तले डाक्टरको लापरवाहीका कारण धादिङका ३९ बर्षिय रमेश दनैको मृत्यु भएको दाबी गरेपछि अस्पतालले गल्ती स्वीकार गरी घटनामा रकम दिएर सहमति गराएर सुल्झाएको छ । लापरवाहीबाट मृत्यु भएपछि लफडा हुने डरले प्रशासनले प्रहरीको ठूलो जत्था बोलाएर दनैको मृत्युको घोषणा गरेको थियो ।

शनिबार दनैका आफन्तले आन्दोलन नै गर्ने अवस्था आएपछि अस्पतालले गल्ती स्वीकारी सहमति गरेको थियो । तर, उपचारमा संलग्न डाक्टरलाई भने कारबाही गरिएको छैन ।

दनैको मृत्यु यसरी यसरी भयो ११ असोजमा काठमाडौंको रानीवनमा कार दुर्घटनामा परेका दनैलाई तत्काल ग्राण्डी अस्पताल लगिएको थियो । खुट्टाको तिघ्राको जोर्नी (हिप जोइन्ट) फुस्किएको भन्दै शल्याक्रिया गरिएको थियो । ग्राण्डीका डेपुटी मेडिकल डाइरेक्टर डाक्टर बिनोद बिजुक्छे नेतृत्वको टिमले १२ असोज शनिबार दिउँसो शल्यक्रिया गरी सफल भएको बताएको थियो । बिरामी क्रमशः सामान्य बन्दै थिए । गएको आइतबार र सोमबार बिरामीको फिजियोथेरापी पनि गरिएको थियो ।

बिरामीको खाना र दिशा पिसाव पनि सामान्य भइरहेको थियो । गएको साताको सोमबारदेखि बिरामीलाई स्वासप्रस्वासमा अप्ठेरो भएपछि आइसीयुमा पठाइएको थियो । स्रोतका अनुसार डाक्टरहरूले बिरामीको मिर्गौला र मुटुमा समस्या आएको बताएका थिए । अस्पतालले आफन्तलाई ‘दुर्घटनाका कारण भएको आन्तरिक रक्तश्रावका कारण यस्तो समस्या आउँछ’ भन्दै उपचार थालेका थिए ।

बिरामीको अवस्थाबारे सशंकित बनेका आफन्तले यहाँ नभए भारतमा लगेर भए पनि उपचार गराउने प्रस्ताव ग्रान्डी प्रशासनलाई गरेको थियो । तर, उसले कतै पनि पठाउन नमिल्ने भन्दै दबाबमा राखेको थियो । बुधबार टाउकोको सिटीस्क्यान गर्न लाग्दा बिरामीलाई गाह्रो भएको देखेका आफन्तले केहि गडबडीको आशंका गरिसकेका थिए । तर बिहीबार साँझ भने डाक्टर टोलीले अवस्था सामान्य भइसकेको झूठो आश्वासन दिएका थिए ।

मेडिकल डाइरेक्टर डाक्टर चक्रराज पाण्डेले गल्ती नगरेको भन्दै जहाँ मन लाग्छ त्यहाँ उजुरी दिन भन्दै पीडितलाई उल्टो पीडा दिएको बताइएको छ । आफन्तले शव नलिने बताएपछि वार्ताका लागि अस्पताल तयार भएको थियो । पाण्डेले गल्ती नभएको दाबी गरेपछि अस्पताल प्रशासनले गल्तीका कारण विरामीको मृत्यु भएको स्वीकार गरी मृतककी पत्नी र छोरालाई बोलाएर भविष्यमा रोजगारीमा लाइदिने सहित ९ लाख ५० हजार दिएको थियो ।

ग्रान्डीले आन्तरिक रक्तश्रावका कारण मृत्यु भएको बताएका दनैको पोष्ट मार्टम त्रिभुवन विश्वविद्यालय शिक्षण अस्पताल महाराजगञ्जमा गरिएको थियो । पोष्टमार्टको प्रारम्भिक रिपोर्टअनुसार औषधिको ओभरडोजका कारण मिगौला ड्यामेज भई निमोनियाका कारण निधन भएको हो ।

दनैको मात्र होइन, डाक्टरको लापरवाहीका कारण ग्रान्डीमा धेरै बिरामीले ज्यान गुमाउनुपरेको पीडित परिवारले बताएका छन् । नेपालको एकमात्र हेलिप्याड भएको अस्पताल बताइए पनि अत्यधिक महँगो बिल देखाउने कुँवरको अस्पतालमा दैनिकजसो कुनै न कुनै बिरामी समस्यामा परेका हुन्छन् ।

दनैको मृत्यु प्रकरणका विषयमा दैनिक नेपालले ग्रान्डी अस्पतालका मेडिकल डाइरेक्टर डा. पाण्डेसँग बुझ्न कोशिश गरेको थियो । तर, पाण्डे अप्रेशन थिएटरमा रहेको जानकारी दिँदै घटनाबारे अस्पतालले थप जानकारी दिएन ।
-satyasamachar.com bata
Share