विवाहित महिलाले परपुरुषसँग सम्बन्ध राख्न पाउने

काठमाडौं । भारतको एउटा १५८ वर्षे उपनिवेशकालीन कानुनले विवाहित महिलासँग उनका पतिको अनुमतिविना यौनसम्बन्ध राख्नुलाई अपराध मानेको थियो । सन् १८६० मा सो कानुन लागू भएपछि हालसम्म कति जनालाई परपुरुषसँगको सम्बन्ध अपराधमा दण्डित गरियो भन्ने तथ्याङ्क भने उपलब्ध छैन । भारतीय दण्ड संहिताको व्यभिचारसम्बन्धि प्रावधान स्वेच्छाचारी रहेको र त्यसले पुरुष र महिलाबीच भेदभाव गरेको भन्दै गत वर्ष एउटा रिट दर्ता भएको थियो । भारतका प्रधानन्यायाधीश दिपक मिश्रले व्यभिचार सम्बन्ध विच्छेदजस्ता विषयका आधार बन्न सक्ने भएपनि अपराध भने नभएको निर्णय सुनाएका थिए ।

भारतमा अब समलिङ्गी यौनसम्बन्ध ‘वैधानिक’

भारतमा एक महिनाभित्रै खारेज भएको यो दोस्रो उपनिवेशकालीन कानुन हो । यसअघि समलैङ्गिक यौनलाई अपराध मान्ने १५७ वर्ष पुरानो अर्को कानुन पनि खारेज भएको छ । धेरै भारतीयलाई व्यभिचारसम्बन्धि त्यस्तो कानुन छ भन्ने जानकारी पनि थिएन। बिहीवारको निर्णयपछि त्यसबारे सामाजिक सञ्जालमा व्यापक चर्चा भएको छ ।

अदालतले के भन्यो ?

-महिलाको शरीरमा उनको आफ्नो अधिकार हुन्छ ।
-वैवाहिक सम्बन्धको पवित्रता महिलामा मात्र हैन पुरुषमा पनि हुनुपर्छ ।
-व्यभिचार सम्बन्ध विच्छेदको आधार रहनेछ ।
-पति उनकी पत्नीको मालिक हैन ।
-व्यक्तिको सम्मान र समानताको अधिकारलाई प्रभावित पार्ने कानुनी प्रावधान संवैधानिक हुन सक्दैन ।